Ras Beskrywing
Tuisblad
Skou Uitslae
Kontak Ons
Lede
Ras Geskiedenis
Ras Beskrywing
Ons Rasstandaarde
Skakels
Find us on Facebook
Grootte en gewig

  • Die Dexterbees is die kleinste van die Europese beesrasse (kleinraam), ongeveer die helfte van ‘n tradisionele Simmentaler en Namibiese Braunvieh. Verse en bulle weeg onderskeidelik gemiddeld 19 tot 22 kg en 20 tot 25 kg met geboorte en 300 tot 400 kg en 450 tot 550 kg met volwassenheid.
  • Kleur
  • Word volledig onder die Standaarde van Voortreflikheid bespreek.

Horings

  • Die Dexter-ras kom met of sonder (poens) horings voor. Horings is redelik kort en dik - groei uitwaarts; na voor gekrul by bulle en opwaarts by koeie.

Gebruike

  • Die ras is tipies dubbeldoel en produseer dus smaaklike vleis en kwaliteit melk.
  • Dextervleis is lig gemarmer, van hoë kwaliteit en het `n unieke smaak. Dextervleis het minder vetlae as vleis van ander beesrasse en het dus `n goeie vleis-tot-been verhouding en 'n groter haalbare uitslagpersentasie, gewoonlik tussen 50 en 60% van hul lewendige gewig. Aangesien snitte kleiner is die van groter beesrasse, kan die vleis gemaklik in `n huishoudelike vrieskas gebêre word. In die Verenigde State, Europa en Australië word daar `n premie geplaas op Dextervleis - `n faktor wat ryp is in Suider-Afrika.
  • Die melkproduksie van `n Dexter hang hoofsaaklik af van die koei, haar kondisie en die voeding wat sy kry, alhoewel dit verwag kan word dat `n koei 7,6 tot 9,5 liter melk per dag kan lewer (dus voldoende om 2 tot 3 kalwers te voed aangesien hulle gereeld kalwers van ander koeie help voed). Hulle produseer `n ryk melk, relatief hoog in bottervet (gemiddeld 4% tot 5%) en proteïen (+ 3,51%) en baie soortgelyk aan die kwaliteit melk van die Jersey. Sommige mense glo dat die melk meer natuurlik gehomogeniseer is a.g.v kleiner roombolletjies wat binne 24 uur van die melk skei. Nadat die room verwyder is vir die karring van botter en room, is die melk steeds soet en ryk genoeg dat goeie kaas en maaskaas vervaardig kan word.

Bouvorm

  • In ag genome hul klein statuur, is die Dexter lank, breed en diep in bouvorm.

Aanpasbaarheid en gehardheid

  • Dexters is uiters aanpasbare beeste en kom feitlik regoor die wêreld voor - bykans die hele Europa (insluitentend Noorweë en Swede), die V.S.A. en Kanada, Argentinië, Australië, Jamaika, Kenia, Zimbabwe, Suid-Afrika en natuurlik Namibië.
  • Dexterbeeste is gehard en benodig baie minder voeding as die meeste ander beesrasse, aangesien hulle meer nitrate uit hul voeding opneem. Dexterbeeste oorleef onder omstandighede waarin die meeste ander beesrasse dit nie moontlik vind nie.
  • Dexterbeeste gedy dwarsoor Namibië - vanaf die natter noordelike streke tot in die droër westelike en suidelike dele van die land.

Lewensverwagting, teling en reproduksie

  • Dexterbeeste leef lang en produktiewe lewens, selfs tot op die ouderdom van 17 jaar. Alhoewel dit nie in Namibië aanbeveel word nie, begin hulle op die vroeë ouderdom, van so vroeg as 8 maande, reeds teel en verse kan op 17 maande alreeds hul eerste kalwers lewer. Meer kalwers beteken meer profyt, AL WEEG HULLE AANSIENLIK MINDER.

Die Dexter het oor die algemeen klein kalwers en kalf dus gemaklik en sonder hulp. Hulle is goeie moeders en steek gereeld kalwers weg indien daar voldoende beskutting is. Dexterbulle kan gemaklik by groter beesrasse gebruik word vir dekking van eerstekalf verse om kalwingsprobleme te voorkom.

Gemaklike boerdery/hantering

  • Die Dexter is intelligent en het oor die algemeen `n rustige temperament. Tesame met hul klein statuur is hulle maklik hanteerbaar en baie gewild onder vroue en kinders, wat gereeld by landbouskoue ingespan word as hanteerders.

Siektebestandheid

Die Dexter is redelik bestand teen siektes en parasiete wat algemeen onder alle beesrasse in Namibië voorkom.

Geskik vir klein en groot plase

Die Dexter se statuur en temperament maak hulle ideaal vir klein plase (of plotte), maar hulle is net so geskik vir groter plase. Gedurende die 1980‘s en 1990‘s het die meeste beesrasse geneig om groter en groter te teel - deesdae is die neiging egter om eerder te beweeg na medium-raam diere a. g. v. ons ekstensiewe omstandighede. Die ras word dus meer en meer populêr in die suide van Namibië en die suidweste van Suid-Afrika, terwyl dié ras ONGETWYFELD die antwoord is vir “the small African farmer.”



 SKOU KAMPIOEN 2015

2015 Senior & Breed Champion
Sacwitz Dansim
Owner Jankie Jankowitz




Developed by Flow